Филмска брканица се случувала синоќа по скопските улици и околните автопатишта. Двајца осуденици на отпуст од затворот Идризово вчерaвечер се лишени од слобода, откако се обиделе да избегаат од полициска патрола, по што излетале од патот кај населбата Нова Колонија, информираат од Министерството за внатрешни работи.
Според полицискиот билтен, двајцата осуденици на отпуст околу 20:20 часот се движеле со патничко возило марка „Ренџ Ровер“ на улицата „Панче Неделковски“ во Скопје и не застанале на даден знак од полициска патрола, по што се дале во бегство.
Веднаш е организирана потера по возилото, кое се упатило кон обиколницата, а потоа кон регионалниот пат Скопје – Велес, каде што е пресретнато од полицијата во близина на населбата Нова Колонија, кај скопско Идризово.
Во описот на настанот се вели дека полицајците со службено возило марка „Мазда“ се обиделе да го престигнат „Ренџ Ровероt“, но неговиот возач во два наврати удрил во полициското возило. Потоа, полициски службеник испукал предупредувачки истрели во воздух, но и покрај тоа, возачот на „Ренџ Ровероt“ не застанал и продолжил да вози по патот.
Сепак, во близина на населбата Нова Колонија возилото излетало од патот. Во „Ренџ Ровероt“ се пронајдени пет мобилни телефони, пари и клучеви од повеќе возила.
По документирање на случајот, како што велат од МВР, против приведените Н. А. и А. Ј. ќе бидат поднесени соодветни пријави.
