По повод Меѓународниот ден на Бошњаците, во Скопје беше промовирана капиталната научно-историска монографија „Велика медреса во Скопје (1925–1941)“ од академик проф. д-р Изет Шаботиќ.
Промоцијата се одржа во петок, 25 септември 2026 година, на Меѓународниот балкански универзитет во Скопје, во организација на Здружението за култура, заеднички вредности и одржлив развој „ДИВАН“, како дел од одбележувањето на 28 Септември – Меѓународниот ден на Бошњаците.
Пред присутните гости од академскиот, културниот и општествено-политичкиот живот за книгата говореа академик Ферид Мухиќ, проф. д-р Реџеп Шкријељ, проф. д-р Зеќир Рамчиловиќ и авторот академик Изет Шаботиќ.
Книгата претставува резултат на долгогодишно истражување и обработка на повеќе од 2.200 архивски документи, преку кои авторот ја реконструира историјата на Велика медреса во Скопје, која дејствувала во периодот 1925–1941 година. Како што беше истакнато на промоцијата, делото не е само историја на една образовна институција, туку сведоштво за времето, положбата на муслиманското население и создавањето на една нова интелектуална генерација на Балканот.
Посебно беше нагласено дека од клупите на Велика медреса излегле бројни интелектуалци, професори, правници, судии, општествени дејци и антифашисти. Во контекст на значењето на книгата за современото време, проф. Д-р Рамчиловиќ се осврна и на потребата од соочување со историските факти и зачувување на културата на сеќавање. Тој посочи дека токму научното истражување, архивските документи и фактите се најсилниот одговор на историскиот ревизионизам и негирањето на историските вистини.
Промоцијата во Скопје беше и потсетување дека културното и историското наследство не припаѓа само на една заедница, туку претставува дел од пошироката историја на Скопје, Северна Македонија и Балканот.
Здружението „ДИВАН“ упатува благодарност до авторот академик проф. д-р Изет Шаботиќ, промоторите, Меѓународниот балкански универзитет, сите институции, организации и гости кои со своето присуство придонесоа кон успешното одбележување на Меѓународниот ден на Бошњаците.
