Велосипедскиот клуб „Гевгелија точак клуб“ викендов го организира планинско-велосипедскиот настан „Сите уф Серменин“. Како што најавуваат организаторите, дводневниот настан кој ќе се случува на падините на планината Кожуф, во гевгелиското село Серменин, предвидува кампување, велосипедска тура, заеднички ручек и музичка програма.
Програмата започнува утре од 15 часот, со поставување на шаторите, а од 20 часот е закажан музичкиот дел. Во недела во 8 часот е пристигнувањето на учесниците кои се пријавиле за велосипедската тура, која почнува од 9 часот. Од 15 часот е заедничкиот ручек и забавниот дел од програмата. Организаторите ги повикуваат сите љубители на природата да учествуваат во настанот.
-Не мора да сте велосипедист за да бидете дел од манифестацијата. Заедно со пријателите или семејството може да се учествува на добра журка, кампување и уживање во природата на Кожув, се вели во информацијата од „Гевгелија точак клуб“.
Серменин е едно од постарите села во околината на Гевгелија, кое е познато и како воздушна бања, поради чистиот воздух, боровата шума и ниската влажност на воздухот. Во селото можат да се посетат црквата „Св. Ѓорѓи“, водопадот „Вера“, како и манастирот „Св. Илија“, кој е лоциран по патеката на велосипедските тури.
