Денеска се навршуваат пет години од пожарот во модуларната ковид-болница во Тетово, каде што загинаа 14 луѓе, а десетина беа повредени.
12 од жртвите беа пациенти кои се лекувале од ковид, а двајца нивни блиски роднини.
По долготрајниот судски процес, директорите на тетовската болница, Флориан Бесими и Артан Етеми, беа осудени на три години казна затвор за тешки дела против општата сигурност, а правното лице Клиничка болница доби парична казна од еден милион и триста илјади евра.
Во август годинава, Основното јавно обвинителство за гонење организиран криминал и корупција ја затвори истрагата за јавните набавки поврзани со изградбата на 19 модуларни болници во Македонија, оценувајќи дека не постојат основи на сомнение за злоупотреба на службената положба и овластување или за друго кривично дело кое се гони по службена должност.
Со оваа одлука, Обвинителството утврди дека нема елементи за кривично гонење на тогашниот министер за здравство, а сегашен лидер на СДСМ, Венко Филипче. Ваквата одлука предизвика бура реакции во јавноста дека Обвинителството, предводено од Ислам Абази, го амнестирало Филипче од одговорност за трагедијата.
ВМРО-ДПМНЕ предупреди дека предметот со години намерно се чувал во фиока и дека Филипче има директна одговорност, бидејќи преку измени во Законот за градење, болниците биле категоризирани како „урбана опрема“, со цел да се заобиколат стандардните градежни процедури.
