Здравствено небезбедна, водата во Струга 5 дена е забранета за користење. Матноста на изворите во Шум што го снабдуваат градот со вода, ја надминува законски дозволената граница дури за десет пати. Жителите од Шум и Заграчани со петиција до надлежните институции, бараат итно запирање на ископувањето и фрлањето динамит од каменоломот над изворите на питка вода во Шум.
„Континуираните активности на каменоломот, особено фрлањето динамит е сериозен ризик за јавното здравје на жителите. Загадената вода претставува директна закана за животот и благосостојбата на граѓаните. Бараме превземање на мерки против одговорните субјекти, доколку се утврдат прекршувања на важечките закони и институционална гаранција дека изворот ќе биде трајно заштитен“.
Директорот на струшки „Водовод“, кој 4 децении работи во претпријатието, најави оставка од морални причини. Тој на своите претходници им укажувал на опасноста од загадување на изворите.
„Дека таму се врши ископ и дека може да дојде во ваква последица на заматување на изворите. Има закон за води, во заштитени зони не смее да се врши ископ. Над изворите значи со денационализација се вратени места во кои ние немаме ни пристап. На времето беше тоа заштитено, не остававме ни животно да помине, сега веќе тоа не е така“ – вели Меџаит Јусуфоски, директорот на Ј.П. „Водовод“ – Струга.
Увид на лице место направиле и од Центарот за јавно здравје и констатирале дека изворите не биле воопшто заштитени.
„Каде се заштитените зони да ги видам? Прва, втора, трета, заштитена зона и дали се оградени. Порано биле оградени, но мрежите едноставно ги снемало. Значи тие треба да се оградени заштитните зони и никакви изведби не смеат да се вршат во близина во самите заштитни зони“ – вели Лидија Симоноска – Центар за јавно здравје Охрид
Случајот го чешла и полицијата. ОВР Струга заедно со надлежните институции презема интензивни мерки со цел откривање на причините за загаденоста на водата, како и откривање на сторители на кривични дела. По завршување на сите активности, до надлежното Јавно обвинителство ќе се достави соодветен поднесок – стои во соопштението од полицијата.
