Пеколна вечер на истокот-пожарите ја зедоа првата жртва и пеплосаа неколку села

Пеколна вечер во источниот дел на државата каде пожарите ја зедоа првата жртва и пеплосаа неколку села. Настрада повозрасен маж во кумановско Кокошиње кој се задушил во чадот од пожарот кој поради силниот ветар се ширел со голема брзина. Од кумановско кон светиниколско огнената стихија направи пустош во неколку села. Најдраматично беше во Немањици каде изгореа дури четвртина од куќите. Жителите во паника спасуваа што може да се спаси.
Со огнената стихија се справуваат пожарникари од Свети Николе, доброволци, месното население, пожарникари од Штип, Неготино и Кавадарци и Велес.
На терен е присутна и војската, а еден хеликоптер интензивно ги гасеше куќите кои гореа во село Немањици.
Градоначалникот Владев информира дека пожар имало и во светиниколското село Малино и таму биле зафатени куќи, а горело и во правец на селото Богословец.
Инаку цело Овче Поле е зачадено и се гледа чад и пламени јазици на неколку локации во овчеполскиот регион.
Директорт на ЦУК Стојанче Ангелов претходно информираше дека после попладневните часови 12 села во државава биле зафатени од пожарите на отворено. Станува збор за села во светиниколско, кумановско, пробиштипско и штипско.