Кој кога сака влегува, кога сака излегува – истражниот затвор Шутка е хотел промаја. 4 затвореници во моментов се во бегство. Вонредниот инспекциски надзор на Управата за извршување санкции пред три дена открил дека во отвореното и полуотвореното одделение недостасувале 11 притвореници, по што дел од нив се вратиле зад решетки. Според директорот на Управата Александар Пандов, виновникот за ваквиот хаос е првиот човек на затворот Филип Андов кој ќе добие кривична пријава.
- И покрај вонредниот надзор, четворица лица од овие 11 што не ги најдовме во затворот, утрово во пет часот не се наоѓаат таму и се во бегство. Во меѓувреме додека го правевме надзорот, десет од тие лица по еден час, два, три часа се враќаа и слободно се движеа околу нас и разговараа со полицајците, рече Пандов додавајќи дека во затворот било како „хотел промаја“ ..
Според Пандов, затворските полицајци се во незавидна ситуација бидејќи затворениците го имаат последниот збор.
- „Тие се јавуваат на Сокол, вадат телефони пред нас и велат дека им се закануваат, посочуваат ‘директоре ние ви дадовме пари..’. Кога ќе имаме записник ќе го доставиме до Обвинителството. Јас го замолив премиерот Мицкоски, не само Сокол, туку и во најголем дел од затворите, слична е состојбата и тие се хотел промаја. И она што ние мислиме дека е затвор, фактичката состојба не е таква“, додава Пандов.
Пандов најавува кривична за Андов, директорот на Шутка возвраќа: дека ќе го тужи за нарушување на неговиот и угледот на интитуцијата со која раководи. Неточни се обвинувањата тврди првиот човек на затворот, но и тој потврдува дека четворица затвореници не се достапни на органите на прогонот..
- „Ги повикувам институциите да постапат согласно закон, да ги утврдат сите факти и околности, а по извршениот вонреден надзор во петокот, каде што од страна на директорот Пандов се споменува дека не биле присутни 11 лица, а пријавено е само едно, додека другите биле контактирани по телефон да се вратат. Епилогот од таквото нестручно и неправилно однесување на директорот Пандов резултираше со бегство кое се случи во текот на ноќта од страна на четири лица“вели Филип Андов – Директор на Истражниот затвор „Шутка“.
Според Пандов седум години не била направена контрола во истражниот затвор Шутка, а Управата се обидува да дојде до материјалите од видеонадзорот кој се чувале само 30 дена..
