Во организација на Македонската џиу-џица федерација, денеска, во спортската сала „Гоце Делчев“ во општина Илинден беше отворено 14. издание на традиционалниот Меѓународен џиу-џица турнир „Скопје Опен 2025“.
Како што соопштуваат од Општина Илинден, на годинашниот настан учествуваат вкупно 23 клубови од седум држави, со повеќе од 280 натпреварувачи. Учествуваат екипи од Словенија, Србија, Република Српска, Црна Гора, Грција, Бугарија, како и голем број клубови од Македонија. Пополнети се, велат, вкупно 204 категории во борби и 38 категории во НеВаза, што претставува досега најголем обем на категории одржани на турнирот.
– Присутните ги поздрави градоначалникот на Општина Илинден, Александар Георгиевски, коj официјално го означи почетокот на турнирот. Во своето обраќање, градоначалникот Георгиевски нагласи дека Општината континуирано ги поддржува спортските активности и додаде дека фактот што турнирот по четврти пат се одржува во Илинден е доказ за успешно партнерство и добра организација, се наведува во соопштението.
Ова спортско издание, додаваат, опфаќа натпреварување во голем број дисциплини и категории, во машка и женска конкуренција, како и за деца и возрасни.
– Љубителите на џиу-џицата имаат можност да следат динамични борби, натпревари во НеВаза и демонстрации на техники од дуо-системот. Во рамките на турнирот ќе се одржи и финалето на „Јадранската лига“, во кое ќе се натпреваруваат три женски и четири машки сениорски екипи. Општина Илинден останува посветена на поддршката на спортските настани и продолжува да создава услови за развој и промоција на спортот на локално ниво, стои во соопштението.
