Во рамки на Модниот викенд Скопје, денеска од 17:30 до 19:30 часот во просторот Ареа во Дајмонд Мол ќе биде отворена изложбата „Зелена и Одржлива Мода – Нордиско-балтичка приказна“.
На изложбата ќе бидат претставени дела создадени од шест нордиско-балтички и пет македонски дизајнери, кои заеднички работеа во рамки на резиденцијалната програма на истоимениот проект.
Настанот ќе биде збогатен со две тематски сесии на Отворени разговори. Првата, под наслов #MadeWithSweden, ќе започне во 17:30 часот и ќе се фокусира на практиките на шведските брендови во однос на одржливоста и нивните барања кон производствените капацитети. Втората сесија, Designers’ Voices, со почеток во 18:30 часот, ќе биде посветена на процесот на соработка, инспирацијата и иднината на одржливата мода.
По отворањето, изложбата ќе биде преместена на приземјето на Дајмонд Мол, каде ќе биде достапна за посетителите од 30 март до 5 април.
Проектот е финансиски поддржан од Нордискиот совет на министри, а се спроведува од Амбасадата на Шведска во соработка со амбасадите на Данска, Финска, Норвешка и на Литванија, како и во партнерство со Македонското модно здружение.
Изложбата е дел од официјалната програма на настанот и е отворена за пошироката јавност.
