Институциите продолжуваат со засилените контроли на угостителските објекти. Министерството за внатрешни работи денеска објави дека вчера во периодот од 10 до 15 часот биле извршени контроли во Тетово и Гостивар. Контролирани биле 16 угостителски објекти, а два од нив се затворени.
„Полициски службеници од СВР Тетово и ОВР Гостивар, во соработка со претставници од Управата за финансиска полиција, Државниот пазарен инспекторат и Дирекцијата за заштита и спасување, спроведоа акциска контрола. Целта беше сузбивање на недозволени криминални активности во угостителските објекти, со акцент на борба против нелегална трговија со дрога, посредување во проституција, перење пари, корупција и други нелегални дејствија“, се вели во соопштението на МВР.
Во текот на контролните активности, беа откриени низа неправилности во 16 угостителски објекти (10 во Тетово и 6 во Гостивар), а согласно законот, ДПИ и ДЗС ќе поднесат соодветни извештаи. Поради утврдените прекршоци, два угостителски објекти во Тетово беа затворени, информираат од Министерството за внатрешни работи.
