Под мотото „По стапките на Спасе“ во музејот, што го носи неговото име, во селото Глобочони, општина Пустец одржана е литературна вечер посветена на животот, делото и наследството на големиот писател Стерјо Спасе.
– Ова е посебна литературна и културна вечер во Глобочани, посветена на 112-годишнината од раѓањето на нашиот Стерјо Спасе, голем Македонец, еден од најзначајните претставници на албанската литература и име со кое Преспа со право се гордее, рече градоначалникот Пали Колефски.
Упати посебна благодарност до претседателот на Советот на округот Корча, Петрика Толкуци, за неговото присуство и поддршка, до Клубот на писатели „Новиот свет“ („Bota e Re“), како и до сите гости, писатели, истражувачи и љубители на уметноста кои „преку своите зборови, размислувања и анализи донесоа вредни согледувања за животот, ликот и творештвото на Стерјо Спасе”.
Според Колефски, денот на раѓањето на Спасе, секоја година ќе биде ден посветен на средбата со литературата и културата, со што, како што најави, ова одбележување ќе стане трајна традиција во Голобочани.
– Повторно ќе се среќаваме, секоја година, „По стапките на Спасе“, за повторно да го откриваме неговото творештво, да го одржуваме живо сеќавањето за него и неговото дело и да го пренесуваме неговото наследство на новите генерации, порача градоначалникот Колефски.
– Стерјо Спасе е дел од културниот идентитет на Преспа. Им благодариме на сите кои беа дел од оваа вечер и кои го претворија сеќавањето на писателот во жива средба со литературата, културата и нашето наследство, рече Ефтим Митревски, кустос во музејот.
– Стерјо Спасе е дел од културниот идентитет на Преспа. Им благодариме на сите кои беа дел од оваа вечер и кои го претворија сеќавањето на писателот во жива средба со литературата, културата и нашето наследство, рече Ефтим Митревски, кустос во музејот.
Стерјо Спасе е роден во село Глобочани, на 14 август 1914 година. Починал на 13 септември 1989 година во Тирана. Тој е еден од значајните претставници во современата албанска литература, а истовремено е еден од најуспешните писатели во Албанија од македонско потекло.
Во 1935 година во Корча го издава својот прв роман „Од живот во живот – зошто”. Во романот наречен едноставно „Зошто” ремек-дело на неговото творештво, тој ја опишува историјата на млад интелектуалец, кој се вратил во своето родно село по завршување на обуката и за судирот со традиционалното, кој го води до самоубиство.
