Трагично-морничава слика на имотот од прилепското семејство Богески. Пеплосани преку пет тони сув квалитетен тутун, изгорен објект каде бил чуван тутунот, скелињата каде се сушел, но и неповратно уништени големи количини репро-материјали, најлони, како и 2 декари со лешници. Ова е катастрофалниот биланс од вчерашниот пожар кој околу 11.30 часот го зафатил земјоделскиот имот на петчленото семејство Богески, кое штотуку си заминало од имотот. Сè уште видно вознемирен и во шок, главата на семејството Горан, со солзи во очите, ни раскажа дека она што со мака го печалеле со години, за само половина час станало пепел. Штетата ја проценува на над 80.000 евра.
„Ова јас го печалев во последните 10 години. Ова преку ноќ не ми е дојдено мене. Внатре, досега имам набрано 7.000 низи, е ова што е останатото нека се одбие и нека се пресмета колку е штетата. Значи, од 7.000 низи, 1.000 нека има овде, тоа се 6.000 низи, 1.200 балиња. По 4-5 кг беше балето квалитетен тутун. Изгорени се 2 декари лешници комплет, скелината се стопени“, – вели Горан Богески.
Заради зголемениот број пожари и значително ограничените ресурси, од ТППЕ пристигнало само едно помало возило, па во гаснењето се вклучило и целото семејство, во кое има и три деца. Горан, без да обвинува некого, убеден е дека ако имало повеќе противпожарни возила и пожарникари, штетата сигурно ќе била многу помала.
„Значи, ако имаше барем едно големо возило, барем објектот ќе се спасеше… Јас изгорев што изгорев, нека се вложи во противпожарни возила, 21 век сме, ваква хаварија да ни се направи, не сме ниту во Африка, ниту којзнае каде“, – објаснува Богески.
Први на помош на овие големи земјоделци, кои секоја година обработуваат и до 80 декари со тутун и други култури, им притекнаа од Сојузот на тутунски здруженија, ветувајќи им финансиска помош.
„Навистина огромна е штетата што е направена од пожарот. Ние како Сојуз сегде сме помогнале, ќе помогнеме и овде, неспорно е тоа. Меѓутоа, во оваа прилика би апелирал до сите тутунопроизводители, особено до откупувачите, да помогнат заради тоа што овој кооперант има договори во речиси сите откупни компании“, – кажа Кире Ристески, претседател на Сојузот на тутунски здруженија.
Инаку, во меѓувреме, ова семејство ги чека и ланските субвенции во вредност од околу 20.000 евра кои, заради дополнителни проверки, сè уште не им биле исплатени. Па, молат и овие пари да им бидат исплатени што поскоро.
