Водата во Гостивар е безбедна за пиење. По пет недели неизвесност, страв и купување флаширана вода, конечно стигна веста што ја чекаа илјадници гостиварци – забраната за пиење на водата е укината. Анализите од седум мерни места покажале дека физичките, хемиските и микробиолошките параметри се во законски дозволените граници.
„ Водата беше микробиолошки исправна уште од крајот на минатата недела, но при извршените испитувања беше утврдено зголемено количество на резидуален хлор. Станува збор за процес на дезинфекција на водата и поради измерените вредности беше потребно да се превземат дополнителни мерки и беше потребно да се причека со препораките за пиење на водата.“– вели Оливер Миланов, директорот на Агенцијата за храна и ветеринарство.
Дека водата е безбедна, членовите на кризниот штаб не сакаа само да кажат, туку сакаа и да покажат. Излегоа пред камерите и беа меѓу првите кои се напија вода од градските чешми.
На гостиварци им олесни што слушаат дека состојбата е нормализирана. Граѓаните сепак стравуваат за своето здравје. Велат дека по се што се случуваше, ќе им треба време време за повторно без сомнежи да ја наполнат чашата од чешма.
„Се плашиме да пиеме пак, страв ни е за здравјето. Се снаоѓавме полневме вода. Ќе пиеме ако е безбедна.“- велат граѓаните.
Надлежните препорачуваат граѓаните пред повторно да ја користат водата за пиење, да ги истечат чешмите. Порачаа во иднина да се работи домаќински и одговорно при управувањето со водовото, а истрагата да ги лоцира и казни виновниците за хаваријата..
Во меѓувреме, контролите продолжуваат. Примероци од водата ќе се земаат три пати неделно, со цел состојбата да се следи континуирано.
„На граѓаните им се порачува пред да ја користат водата за пиење да ја остават да истече од чешмата неколку секунди особено доколку водата подолго време не била пуштена од чешмата. Се апелира рационално и одговорно да ја користат водата особено во период на зголемена потрошувачка.“- вели Миланов.
Инаку, забраната за користење на водата од водоснабдителните системи во Гостивар беше донесена на 17 јули, откако беше утврдена фекална загаденост и зголемено присуство на хлор. Последиците ги почувствуваа околу 5.000 жители, кои пријавуваа здравствени проблеми.
