Ученици од основното општинско училиште „Илинден“ – Крива Паланка денеска остварија посета на Општината, како дел од наставните активности за запознавање со работата на локалната самоуправа. Како функционира една општина, кои се надлежностите на градоначалникот и што се случува зад вратите на општинската администрација, беа само дел од прашањата што учениците му ги поставија на градоначалникот Сашко Митовски, во непосреден разговор со него.
– Учениците имаа можност одблизу да дознаат како се носат одлуките, кои се секојдневните обврски и предизвици на локалната власт и како таа одговара на потребите на граѓаните. Со искрена љубопитност и низа интересни прашања, малите посетители го поттикнаа разговорот и за одговорноста што ја носи функцијата градоначалник, но и за тоа што е потребно за да се стане „прв човек“ на една општина – информира службата за комуникација со јавноста.
Митовски рече дека нивната главна мотивација е да создадат подобри услови за младите.
– Затоа ја градиме Крива Паланка како дом, најубаво место за живеење на сите генерации – истакна Митовски.
Од Општината нагласија дека учениците изразиле задоволство од можноста да ги посетат административните простории во Општината и директно да се запознаат со дел од општинската администрација, нивните активности и надлежности.
– Средбата беше можност децата преку непосредно искуство да ја запознаат работата на институциите, но и да разберат дека интересот, прашањата и активното учество на младите се важен дел од животот на секоја заедница – додаваат од Општината.
Локалната самоуправа на Општина Крива Паланка вчера ја посетија учениците од ООУ „Свети Јоаким Крчовски“.

