Претседателот на ЗЕЛС и градоначалник на Кисела Вода, Орце Ѓорѓиевски, денес оствари средба со претседателот на Стопанската комора на Македонија, Бранко Азески, на која разговараа за проблемите на бизнисите, децентрализацијата и инвестиционата активност на општините.
„ Денес бев домаќин на претседателот на Стопанската комора на Македонија, Бранко Азески, со кого дискутиравме за неколку теми важни за бизнисот и општините. Разговаравме за проблемите со кои се соочуваат бизнисите, процесот на децентрализација и инвестиционата активност на општините. Претседателот ме информираше дека интересот на најголемата и најзначајна бизнис организација е да се пренесе инвестиционата активност низ целата држава, што ќе овозможи зголемен раст на бруто домашниот производ, како и постигнување на целите за континуиран раст, кој ќе резултира со поголем стандард за граѓаните и поголем профит за компаниите,“ истакна градоначалникот.
Стопанската комора на Македонија ќе ги поддржи сите иницијативи на Владата кои имаат за цел остварување на раст од 4%, изградба на правна држава, како и почитување на принципите на пазарната економија.
„ Го информирав претседателот за активностите на општината во оваа насока, и разменивме мислења за имплементацијата на политиките што ќе водат кон остварување на оваа суштинска цел – ослободување на сите клучни точки за развој на бизнисот, создавање поволна бизнис клима и наоѓање решенија кои ќе овозможат поддршка на сите бизниси кои генерираат додадена вредност, водат сметка за заштита на еколошката средина и отвораат нови работни места,“ рече Ѓорѓиевски.
