Општина Гевгелија ќе донира 1,5 милиони денари од буџетот за 2025 година за помош на настраданите во пожарот во Кочани. Одлуката за оваа финансиска помош беше едногласно донесена од Советот на Општина Гевгелија на вонредната седница, на предлог на градоначалникот Андон Сарамандов.
Членовите на Советот на Општина Гевгелија им оддадоа почит на загинатите во пожарот што се случи на 16 март во дискотеката во Кочани, со едноминутно молчење.
„Тажен е поводот за одржувањето на оваа вонредна седница. Не постојат зборови со кои може да се изрази сочувство за згаснатите млади животи, не постојат зборови на утеха за нивните најблиски. Вечен покој и спомен на настраданите, а Бог да им даде сила на семејствата да го пребродат овој тежок момент“, изјавил претседателот на Советот на Општина Гевгелија, Ѓорѓе Попов, на општинската страница.
И Советот на Општина Дојран на вчерашната вонредна седница едногласно донесе одлука за доделување парични средства во висина од 500.000 денари на семејствата на настраданите и повредените во трагичниот настан во Кочани.
