Општина Делчево доби нова вакумска метларка за чистење на улиците, како донација од скопската компанија „М-Д РЕНТАЛС“, а се очекува машината во наредните денови да биде ставена во функција за одржување на јавната чистота во градот.
Како што информираа од Општина Делчево, станува збор за нова машина од марката „BAIYI“, произведена во 2024 година, која поседува ИСО и СЕ сертификати. Вредноста на донацијата изнесува 399.992 денари со вклучен ДДВ. Во рамки на донацијата, компанијата обезбедила и обука за вработен во ЈКП „Брегалница“ за управување со новото возило.
На официјалното примопредавање на машината присуствуваше градоначалникот на Делчево, Иван Гоцевски, кој оцени дека донацијата претставува позитивен пример за успешна соработка меѓу локалната самоуправа и бизнис-секторот.
– Изразувам искрена благодарност до компанијата „М-Д РЕНТАЛС“, која ги препозна нашите заложби за почисто и поубаво Делчево. Ова е пример дека општествената одговорност создава трајни резултати, особено кога станува збор за јавната чистота. Секоја инвестиција во комуналната инфраструктура претставува инвестиција во подобра иднина за нашиот град, изјави Гоцевски.
Од Општината очекуваат со ставањето во употреба на новата метларка значително да се подобри одржувањето на јавната чистота, да се овозможи побрзо и поефикасно чистење на улиците, тротоарите и другите јавни површини, како и да се унапредат условите за работа на вработените во комуналното претпријатие.
