Со свечена церемонија на плоштадот „Скендербег“ денес официјално е отворен Албанскиот саем на книгата – Скопје 2026, во организација на Општина Чаир и Институтот за книга и промоција од Тирана.
Градоначалникот на Општина Чаир, Изет Меџити, како што се наведува во општинското соопштение, во обраќањето пред присутните истакна дека саемот претставува значаен момент за афирмација на албанскиот јазик, културата и книгата во јавниот простор.
-Денес Скопје зборува на албански јазик. Зборува преку гласот на книгите, преку јазикот на мислата и преку присуството на нашата пишана култура, на отворањето на Албанскиот саем на книгата за првпат во овој град- истакн Меџити.
Тој нагласи дека оваа манифестација е доказ за живоста на албанската култура и за силата на пишаниот збор, потенцирајќи дека ваквите настани имаат клучна улога во поттикнување на читањето, особено кај младите.
-Овој саем претставува значаен момент за албанскиот јазик и култура, како доказ за нивната живост и за силата на пишаниот збор. Тоа е чекор што ја поставува албанската книга во центарот на јавниот простор и го потврдува континуитетот на еден културен идентитет што не избледува-рече Меџити.
Албанскиот саем на книгата – Скопје 2026 ќе биде отворен за посетителите до 7 јуни. Во рамки на програмата се планирани промоции на книги, средби со автори, литературни дискусии, како и други културни активности, со учество на издавачки куќи од повеќе албански средини.
