По повеќе од 40 години од место кое што сведочеше на низа девијантни појави до нов центар на културата. Со помош на паричните средства што ги обезбеди Владата во населба Ченто ќе се реновира целосно руинираниот Дом на културата 11 октомври. Градоначалникот на Гази Баба Бобан Стефковски упати благодарност до Владата, која се заложи да им помогне на општините.
-Повеќе од четири децении ова место беше најцрното место во општина Гази Баба, во кое се вршеа и девијантни појави, а за помалку од 18 месеци ќе прерасне во центар за културата општина Гази Баба. Градиме енергетско ефикасен, модерен објект и комплетно инклузивен. Вкупната инвестиција на овој проект е 84 милиони денари, средства обезбедени преку првиот повик на Владата за финансирање на инфраструктурни проекти во општините, изјави Стефковски.
Министерот за локална самоуправа порача дека ова е само еден од проектите што ги помага Владата. Најави дека финансиски средства за подобар локален разој ќе има и во идинина.
-Повеќе од 40 години скоро сите политички гарнитури ветуваа реконструкција и инвестиција за подобрување на условите на овој Дом на културата овде, но тоа за жал до сега не се случи. Би сакал да потенцирам дека оваа Влада преку првиот повик успеа и овозможи средства за да се воведе во градежни активности за реконструкција на овој дом кој што е култно место за жителите од овој дел на Гази Баба, изјави Перински.
Премиерот Христијан Мицкоски ги повика сите општини да аплицираат за финансиските средства што ги обезбеди извршната власт.
-Место кое што ќе добие нов лик, место кое што ќе го користат жителите на Гази Баба, а зошто да не и од цело Скопје. Овој културен дом ќе претставува навистина убаво место каде што ќе можат да се случуваат убави настани. Јас би сакал да можам да ја искористам оваа прилика да честитам и на градоначалникот и на министрите и на сите оние кои што беа вклучени во овој процес, изјави Мицкоски.
Во рамките од првиот пакет помош од државата за општините одобрени беа 274 проекти вредни 66 милиони евра. Во моментов во тек е вториот повик. Се уште трае периодот за аплицирање за средствата од овој пакет. Според она што претходно го соопшти министерот за локална самоуправа досега аплицирале 6 општини со 35 проекти.
Матеја Петровски
