Наместо вода, низ чешмите од градскиот водовод во Струга тече буквално кал. Поради заматување на изворите во Шум кои го снабдуваат градот со вода, стружани останаа без основното човеково право. Водата не смеат да ја употребуваат за пиење, ниту за приготвување на храна, ниту за одржување на лична хигиена. Бидејќи матната вода преку водоводните цевки се дистрибуира до корисниците, таа е здравствено небезбедна и забранета за користење. Од Центарот за јавно здравје велат дека матноста е со повеќекратно зголемени вредности на параметрите од законски пропишаното.
„Озбилна е оваа ситуација затоа што општината подолго време ќе остане без вода. Ви посакувам да имате подлабок џеб, да си изнакупите вода и за капење или езерото е тука. Па ќе полниме вода од езеро ќе ја топлиме и со потуривање личната хигиена ќе се одржува“ – вели Лидија Симоноска – Центар за јавно здравје Охрид.
Земени се два примероци вода, од самиот извор и од испустот, заматеноста на водата е многу висока. Ако дозволената граница на матност е 1,5 единици, таа денес изнесува 28,56. И не само кај изворите, и на другите мерни места каде што е земена вода, од институции, домаќинства и училишта, водата била каллива.
„Дали станува збор за лизгање на земјиште, дали станува збор за некоја друга активност која не би требала да следи над самото извориште и да се извршува, не можам да тврдам со сигурност. Во секој случај има надлежни служби па нека си го откријат сето ова. Изворот Шум мора да се заштити за општината Струга да има безбедна вода за пиење. Оваа вода единствено е за наводнување и за ништо друго“ – вели Симоноска.
Од Центарот за јавно здравје ќе направат детални анализи и ќе го испитаат квалитетот на водата од градскиот водовод, но и од изворите во Шум кои никогаш досега не биле заматени. Од таму со апел до родителите да внимаваат на децата да не играат со заматената и каллива вода. Од јавното претпријатие „Водовод“ информираат дека матноста на водата почнала да се зголемува од 18 часот вчера, заради тоа донеле забрана за користење на водата. Ги информирале сите надлежни институции да излезат на терен и да ја утврдат причината за заматување на изворите. Доколку продолжи ваквата состојба постои ризик од поголеми технички проблеми на системот и можни последици по водоснабдувањето – стои во соопштението од струшки „Водовод“.
