Кај обвинителите има сомнежи дека ексдиректорите на Онкологија, Нино Васев и Нехат Нухи би се дале во бегство, па бараат скопскиот Кривичен суд, да ги прати зад решетки. Притворот се бара поради кривичните дела кои им се ставаат на товар, како и запретените високи затворски казни што им следуваат по докажувањето на вина од страна на обвинителството. Милионската штета што ја направиле на државниот буџет, со малверзациите на клиниакта за Онкологија, е аргумент плус во барањето на обвинителите.
„Во фазата на истрага за овие лица на сила беа мерки на претпазливост, но со поднесување на обвинението подигнат е степенот на сомнение за обвинетите, како и извесноста од кривично правна одговорност и од санкционирање за нивните противправни дејствија“, вели Обвинителството.
Уште во истрагата за Онкологија, ексдиректоррите беа под мерки на претпазливост. За Васев и Нухи, дека би се дале во бегство сомнежите се поголеми за разлика од тројцата лекари онколози за кои Обвинителството бара мерки на претпазливост.
„Поради опасност од бегство како резултат на природата и тежината на предметните кривични дела за кои им се поднесени обвиненија, за тројца обвинети лекари – онколози предложени се мерки на претпазливост – привремено одземање на патна или друга исправа за преминување на државната граница односно забрана за нејзино издавање“ велат од ОЈО Скопје.
Обвинителството поднесе две обвиненија за најголемиот скандал во македонското здравство. Петмина обвинети во два предмети, првиот за финансиските злоупотребите со биолошката терапија на Клиниката за онкологија, а вториот за третманот на пациентите и несооодветната терапија која ја примале. Нино Васев е обвинет во двата случаи, и како директор и како лекар.
