Во рамки на проектот ACT4PRESPA, поддржан од Европската Унија преку програмата „ЕУ за Преспа“, НУ Завод и музеј Битола реализира трилатерална тридневната студентска конференција на тема „Културното и природното наследство во Преспанскиот Регион како средство за комуникација меѓу вековите – современи перспективи“, која се одржа во Претор.
На отворањето на конференцијата се обратија д-р Мери Стојанова, координаторка на проектот ACT4PRESPA, Маргарета Спасов, директорка на НУ Завод и музеј – Битола и Маријана Милевска, проектна менаџерка во УНДП во рамките на програмата „ЕУ за Преспа“.
-Преспа не е само географски простор, туку жив сведок на времето, во кој природата и културата со векови се испреплетуваат. Преку оваа конференција им обезбедивме простор на младите истражувачи да ги согледаат овие вредности од нивна, современа перспектива и поттикнавме нови идеи и иницијативи за заштита и промоција на културното наследство, истакна д-р Мери Стојанова, координаторка на проектот ACT4PRESPA.
На конференцијата учествуваа претставници и студенти од Институтот за етнологија и антропологија при Природно-математичкиот факултет во Скопје, Институтот за заштита на архитектонското наследство, историја на архитектурата и уметноста при Архитектонскиот факултет во Скопје, Универзитетот „Фан С. Ноли“ во Корча и Одделот за балкански, словенски и ориентални студии на Солунскиот Универзитет.
Посебен акцент во програмата беше ставен на поврзувањето на академското знаење со практичното искуство. Во рамките на теренската посета на село Љубојно, како заштитена споменичка целина, учесниците непосредно го истражуваа наследството и дискутираа за можностите за негова заштита, интерпретација и одржливо користење. Овој пристап овозможи поврзување на истражувачките сознанија со локалниот контекст и значењето на наследството за заедниците, соопштија од НУ Завод и Музеј Битола.
