Нова надеж за новата болница во Штип. Тендер за доградба на штипската Клиничка болница ќе биде распишен најверојатно во февруари, најави денеска министерот за здравство Фатмир Меџити. Тој не сакаше да прецизира точен датум, со образложение дека станува збор за бирократски процедури кои не зависат од него. Во меѓувреме Меџити најави дека отпочнато е и кривична постапка против градежната компанија за пробивање на роковите.
„Едвај чекам дента да го распишам тендерот и точно со дата ќе ви кажам и тој што ќе касни ќе плати дебело. Покренав кривична постапка против фирмата која каснела и зошто не се градело. Таа компанија ќе треба да се соочи на суд со нашите органи„ изјави Фатмир Меџити, министер за здравство.
Се прават напори во Штип да се стави во функција и акцелераторот за пациентите со онколошки заболувања. Бункерот кадешто треба да биде сместен ќе се гради посебно, а не со болницата, најави Меџити
„Ја одма го поделив бункерот од проектот на Клиничка болница. Сега не се заедно . ние го тераме проектот за бункерот , брзо тоа да се направи за да може акцелераторот да се стави во функција„ изјави Меџити.
Речиси осум години се гради објектот во која треба да функционира Клиничката болница и сега наместо свечено отварање, на повидок се нови тендери за доградба. Досега се реализирани само 30% од проектот кој требаше да биде изграден со кредит од Банката на Советот на Европа.
