Како да зготвиме вкусно јадење, а притоа да не останеме цел ден во кујна и да не го потрошиме буџетот предвиден за целата седмица. Сите совети за избалансиран и здрав оброк, секој ден од понеделник до петок во поладневните часови, на Алфа, ќе може да ги слушнете во најновото кулинарско шоу 4сезони . Од традиционални специјалитети до модерни гурмански рецепти, во студиото ќе готви познатиот македонски шеф со светско реноме , проф. Дејан Христовски .
„Јас ќе се обидам на гледачите да им преставам малку поедноставен начин на готвење. Секако, ќе обратиме многу внимание на садовите што ги користиме во кујната. Ќе обратиме внимание како треба да биде оргнизиран и среден нашиот фрижидер , затоа што храната во овој момент е и најскапото нешто, бидејќи ако не ја одржуваме правилно ќе ја фрлиме, а тоа не е добро бидејќи нашиот буџет е тој што е„ изјави познатиот македонски готвач, Дејан Христовски.
Алфа присуствуваше на првиот снимачки сет, каде Христовски својата кујна ја делеше со познатиот шеф Мауро Ди Лео, од Италија, кој директно од Дубаи , каде работи во ресторант со Мишелинова ѕвезда, слета во студиото на 4сезони. Приготвија италијански рецепт, но со македонски намирници. Од мирисот што се ширеше во студиото се разбудија сите сетила и настана вистинска екплозија на вкусови и бои.
Во новото кулинарско шоу 4сезони, ќе гостуваат многу познати и талентирани готвачи од Македонија и светот, кои заедно со Христовски ќе бидат инспиранција за многу луѓе да ја засакат кујната, а истовремено да ја слават и промовираат македонската традиционална храна.
