Додека минувате пешачки премин не смеете да зборувате да телефон, да пишувате порака или да носите слушалки во двете уши. Истото важи и за велосипедистите и возачите на мотоцикли и електрични тротинети. Полицијата почна со примена на измените во Законот за безбедност на сообраќајот на патиштата.
Полицајците ќе постапуваат превентивно односно нема од прв дена да пишуваат казни. Сите граѓани кои беа застанати од полициските службеници добија опомена и така ќе биде првите 30-тина дена. Потоа за секое не почитување на законот ќе бидете парично казнети. Пешачењето со телефон во рака или на уво при преминување пешачки премин ќе чини 40 евра, а возење тротинет, мотор или трактор со користење на електронски уред ќе се казнува со 50 евра.
Некои од граѓаните запознаени се дека не смеат да користат телефон или слушалки додека поминуваат, други прв пат слушнаа.
Сите се согласни дека ќе го почитуваат законот и се надеваат дека ќе придонесе за поголема безбедност во сообраќајот. Некои од граѓаните велат дека за одредени случаи треба да се има разбирање.
Од почетокот на идната година ќе почне да функционира и системот Сејфт сити. Иако се уште не започнат да се имплементира, тоа сепак превентивно веќе делува смета професорката Гордана Лажетиќ.
- „Треба во јавноста да се разбие една заблуда дека веднаш на првиот прекрошк ќе ви го земат моторното возило, меѓутоа, за повторници, за оние коишто безобѕирно управуваат со возило со брзина над 120 од дозволената, веќе е нешто што возилото се претвора во опасно орудие и тоа мора да биде одземено“, нагласува Лажетиќ.
На почетокот ќе има поголем број казни, вели професорката, но интитуциите можат да се справат со тоа.
- „Оној којшто не сака да се придржува на тие основни правила во сообраќајот и не треба да биде воопшто учесник во него и тука мислам и на пешаци, и на велосипеди, и на електрични тротинети, тука мислам и на возачи на кое било моторно возило,“ нагласи Лажетиќ.
Според МВР, целта на овие законски измени е да се намали бројот на сообраќајни незгоди предизвикани од невнимателно однесување и да се зголеми безбедноста на најранливите категории учесници во сообраќајот.
