Здравствениот дом во Македонски Брод кој опслужува околу 4.000 жители, освен што е заглавен во долгови, подолг временски период мака мачи и со недостигот од персонал, но и со застарената апаратура. Најмалку двајца општи лекари, неколку медицински сестри, како и тројца возачи за во Службата за Итна помош итно и’ се потребни на оваа јавна здравствена установа, вели в.д. директорот Буде Мојсоски.
„Во моментов имаме недостаток на медицински кадар, и медицински сестри, и доктори. Доктори имаме недостаток поради фактот што, по мое мислење, неплански се испратени одеднаш повеќе специјализанти. Значи, во моментов има осум специјализанти, а биле 11 пред некое време..Исто така имаме недостиг на шофери поради заминување во пензија“, – посочува Буде Мојсоски, в.д. директор на ЈЗУ Здравствен дом, Македонски Брод.
Од друга страна, и покрај тоа што во Домот ги има речиси сите специјалистички амбуланти со вкупно 12 доктори, сепак, загрижувачки проблем е застарената дијагностичка апаратура, во која со години ништо не било инвестирано.
„Апаратурата сета што е, е застарена. Во „Рентген“ се бара дигитализација на рентген-апаратот што е за снимање, исто и ехото за снимање, и тоа е многу старо и е многу тешко за работа. А исто така и специјализантиве кои што веќе привршуваат, во Гинекологија треба да се опреми сега, оти во Гинеколошкото немаме ништо снабдено. И во „Очно“, исто така, при крај е специјализантот…На тоа треба да се мисли. Немаме средства“, – објаснува Мојсоски.
Со цел надминување на овие незавидни состојбите, Мојсоски вели дека веќе доставиле неколку барања до ресорното Министерство и за вработување на потребниот персонал и за набавака на нова апаратура, и сега се во очекување на повратниот одговор оттаму.
Инаку, во моментов, овој Здравствен дом има долг од околу 3,5 милиони денари, наследен од претходното раководство, како и подолга низа од детектирани дубиози кои укажуваат на крајно недомаќинско работење и финансиски злоупотреби кои се случувале во изминативе години и кои надлежните органи веќе ги истражуваат.
Каролина Дурло
