Наум Додевски е среќникот кој го извлече светиот крст положен во водите на Крива Река, од педесетината кои скокнаа по крстот, меѓу кои и градоначалникот на Општина Крива Паланка, Сашко Митовски. Прославата на големиот христијански празник Богојавление -Водици почна со света божествена Богојавленска литургија во соборниот храм Св.„Великомаченик Димитриј” по што беа осветени водите на Крива Река.
-Нека светите води ни донесат здравје, мир и благосостојба во секој дом, порача Митовски.
По овој чин, на централниот градски плоштад во организација на Фондацијата „Со срце за Крива Паланка” и Општина Крива Паланка, во соработка со МПЦ-ОА Кривопаланечко архиерејско намесништво, се одржа традиционалната манифестација “Водици-Пивтијада”.
Стотици граѓани присуствуваа на богатата празнична прослава и традиционална трпеза со кривопаланечки пивтии, а за музичката програма беше задолжена македонската музичка ѕвезда, Ленче Кукиќ.
Во кривопаланечкото село Конопница, Филип Станоевски е среќникот што го извлече крстот од Селска Река.
