Народните правобранители на Македонија, Албанија и Косово денеска во Призрен потпишаа меморандум за соработка со цел да им се гарантираат права на граѓаните на трите земји надвор од државните граници.
-Народниот адвокат на Албанија, Ендрит Шабани, заедно со македонскиот колега, Фатон Сељами и косовскиот Наим Ќелај ветија дека ќе ја претворат соработката во опипливи придобивки за граѓаните во секоја од трите земји, објави албанската државна агенција АТА.
Албанскиот народен правобранител, Шабани ја нагласил „дистанцата помеѓу хартијата и состојбата на терен“.
-Нашите влади се состанаа неколку пати во Тирана, во Скопје или во Приштина и донесоа многу олеснителни акти. Но, ние сме тука заедно да провериме дали тие се спроведуваат. Дали граѓанин што доаѓа од Кукс навистина добиваат медицинска услуга во Призрен? Дали туристите од Косово и од Македонија на албанското крајбрежје се третираат правилно? Овој меморандум ни дава средства да го заштитиме секој граѓанин, изјавил Шабани.
Трилатералниот договор се фокусира на прашања од прекуграничен интерес кои директно влијаат на животот на граѓаните: здравствена заштита во трите земји, меѓусебно признавање на граѓански и семејни документи и одлуки (брак, граѓанска регистрација, лична документација), признавање на дипломи и почитување на правата на сезонските работници.
Посебно внимание се посветува на заштитата на децата на улица и други ранливи категории, како и на институционалниот третман на индивидуални случаи што вклучуваат повеќе од една земја.
Тројцата омбудсмани се согласиле секоја година да изготвуваат и презентираат Заедничка декларација за состојбата со човековите права во регионот.
Според АТА, соработката се одвива во рамки на Алијансата на омбудсмани на Медитеранот (AOM), која ја предводи Ендрит Шабани а во која членуваат и Косово и Македонија.
