Грипот коси. За една недела пријавени се 2062 нови случаи, а двајца пациенти починале од компликации. Најмногу заболени во Скопје. Најпогодени се децата.
„Во однос на возрасната дистрибуција, 1.274 лица биле на возраст од 15 до 64 години. Вкупно 279 биле деца на возраст до четири години, над 65 години биле 266 лица, а 243 биле деца на возраст од 5 до 14 години. Највисока инциденца се регистрира кај децата на возраст до четири години.“– се вели во извештајот на ИЈЗ.
Според извештајот, податоците укажуваат на намалување на процентот на заболени за 11,2% во споредба со минатата недела, но во споредба со истиот период лани, годинава има двојно повеќе заболени.
„ Резултатите добиени од вирусолошкиот надзор над инфлуенца покажуваат дека има регионална географска активност на вирусот на грип. Процентот на позитивност е над границата од 10% шест недели со ред. Согласно овие податоци, во Македонија има висок интензитет на вирусот на грип.“– се вели во извештајот на ИЈЗ.
Од Институтот за јавно здравје апелираат на почитување на општите превентивни мерки како избегнување на големи собири и затворени простории со многу луѓе, редовно миење на рацете, проветрување на просториите и одржување на здрав животен стил. Лицата со симптоми се препорачува да останат дома и веднаш да се јават кај матичен лекар, а кај ризичните категории при секое влошување на состојбата итно да се побара лекарска помош. Заклучно со третата недела, вакцинирани се 79.078 лица, а од ИЈЗ повторно апелираат вакцинацијата да се искористи како најефикасна заштита, особено кај ризичните групи.
