За да се спречи семејното насилство и да бидат згрижени повеќе жртви потребните се седум милиони евра. Оваа сума на пари се потребни за сите сервиси на Националната мрежа против насилство врз жени и семејно насилство да можат да функционираат и да згрижат повеќе жртви но и да се искористат сите услуги кои им се потребни. Најголем дел од овие средства недостасуваат за функционирање на шелтер центрите, советувалиштата за психолошка помош и бесплатната правна помош. Голем проблем претставува и недостигот на центри во руралната средина посочија од Националната мрежа. Жртвите на семејно насилство бараат поголем број на Шелтер центри.
„Досега се издвојуваат релативно малку средства а пресметката која што ја направивме по сценарио дека постепено ќе ги воведуваме сервисите, меѓутоа идејата е за три најдоцна за три години од сега 2026-2027 да се воспостави целосна инфраструктура значи целосна мрежа“, изјави проф.Катерина Шалкова Коцевска-Правен факултет.
Од Националната мрежа велат дека ако сакаме да воспоставиме целосно функционален систем треба да се направи една национална СОС линија, десет упатни центри за жртвите од силување, најмалку 28 засолништва, 19 советувалишта и бесплатна правна помош.
„Психолошката поддршка е клучна и за жените и за нивните деца. Она што во моментов не се случува е што во нашите шелтер центри не постојат психолози кои што работат на редовно ниво континуирано. Значи жените кои што се сместуваат во шелтер во овој момент добиваат само кров над глава и јадење“, изјави Елена Димушевска извршна директорка на Национална мрежа против насилство.
Од Националната мрежа посочуваат дека час поскоро треба да се реагира од страна на државните институции за да се обезбедат средствата а со тоа и да се задоволат потребите на жртвите. Анализата која што тие ја направија и дава на државата предлог како во следните три години да се воспостави систем и според законите но и според Истанбулската конвенција за жртвите од секаков вид на насилство.
