Во тек е истрага за вработен на Универзитетот „Гоце Делчев“ (УГД)-Штип за сомнителни манипулации со оценки, испитни бодови. Министерството за внатрешни работи утринава потврди дека полициски службеници од Одделот за криминалистичка полиција, СВР-Штип, СВР-Скопје и Секторот за компјутерски криминал при МВР, по судска наредба обезбедена од Основното јавно обвинителство Штип вршат претреси на повеќе локации во Штип и Скопје во врска со сторени кривични дела „злоупотреба на службената положба и овластување“ и „оштетување и неовластено навлегување во компјутерски систем“ од страна на Р.Т. раководител на информатички сектор при Универзитетот во Штип. Од МВР посочуваат дека по целосно завршување на акцијата соодветно ќе ја известат јавноста.
Надлежните од Универзитетот „Гоце Делчев“-Штип потврдуваат дека во тек е истрага за овој случај.
Инаку, според првичните информации и овој случајот го имаат пријавено турски студенти, исто како што пред неколку месеци беше фатена професорка со обележани пари, за турски студент да добие преодна оценка на испит.
