Молк во Министерството за култура за скандалите во Агенцијата за филм кои само се таложат. Не одговораат на повиците на Алфа и на прашањата дали е направена детална ревизија на работењето во изминатите години и што се открила таа.
Според наши информации утврдени се низа прекршувања на законите при распределбата на милионски суми, државни пари, наменети за домашни филмски проекти.
Пред неколку месеци Министерството за култура даде негативно мислење за работењето на Агенцијата, но детали не беа соопштени.
Алфа веќе упати и барање за пристап до информации од јавен карактер, но ни на ова, барем засега нема никаков одговор.
За сериозните проблеми во Агенцијата реагираше и друштвото на филмски работници. Тие преку отворено писмо бараат како од техничката влада, така и од новата која се уште не е формирана, итно да ги разгледаат состојбите во оваа институција.
- „Македонскиот филм е доведен до колапс! И покрај нашите бројни предупредувања во 2023 година, македонскиот филм доби буџет за 2024 кој не е доволен за елеметарно да се покријат потребите на нашата кинематографија и кој ја води во нејзино забрзано системско распаѓање“ – Стои во соопштението на Друштво на филмски работници на Македонија.
Македонскиот филм, кој со години наназад е амбасадор на македонската култура и уметност во светот, сега, со скратен буџет и негрижа од надлежните, прави голем чекор назад, алармираат филмаџиите.
- „Она кое што е катастрофално и погубно за нас филмаџиите, а особено за филмските продуценти, во оваа “Барем се снима” слика, е фактот што дел од овие филмови средствата ги имаат добиено во 2023 година, а оние кои добиваат средства оваа година мора да се согласат на половични ислати кои не се во колерација со досегашните стандардни исплати и договорно утврден процент кој продуцентите го добиваат за снимање, од одобрените средства од Агенцијата за филм.“ – Додаваат од ДФРМ.
Инаку и Антикорупциската комисија веќе утврди низа проблеми во оваа институција – за потрошените пари за снимање на некои филмови воопшто и не биле доставени финансиски извештаи.
Никола Цветкоски
