Подмладоците на политичките партии во земјава денеска ќе потпишат Декларација за европски вредности и кохезија на настан во Скопје во организација на Институт Охрид, а поддржан од Европската Унија.
Целта на оваа иницијатива, соопшти организаторот, е да се создаде редок и значаен јавен момент во кој младите политички лидери ќе застанат зад заеднички вредности што се клучни за демократскиот развој и европската иднина на земјата: дијалог, кохезија, демократска култура, одговорност, почитување на различностите, солидарност и посветеност кон европскиот пат на Македонија.
-Во време кога јавниот простор е често обременет со политички поделби, недоверба и конфронтација, ваквите иницијативи имаат особено значење. Тие покажуваат дека младите политички генерации можат да препознаат заедничка вредносна основа и да испратат порака дека европските вредности треба да останат во сржта на општествениот и политичкиот развој на државата. Институт Охрид преку оваа значајна иницијатива продолжува со својата две децениска работа во областа на демократската култура, политичкиот интегритет и конструктивниот меѓупартиски дијалог меѓу младите политички актери – се вели во соопштението.
Настанот е организиран по повод Денот и Месецот на Европа и е финансиран од ЕУ. Со својата симболика и јавна тежина, се додава во соопштението, тој има за цел да даде должно внимание на младите политички генерации и на нивната улога во градењето на поодговорна, подостоинствена и поевропска политичка култура.
На настанот поздрави обраќања ќе имаат Билјана Јанева, извршна директорка на Институт за економски стратегии и меѓународни односи – Охрид, Стефен Худолин, раководител за соработка од Делегација на ЕУ и Валентина Величковска, извршна директорка на Граѓански ресурсен центар.
