Нема опасност од ширење на морбили во општина Петровец уверува градоначалникот Борче Митевски.Тој вели дека издал итна наредба до директорите на училиштата во општината, будно да ја следат состојбата со учениците, по пријавата на заразено дете со морбили од Долно Коњаре. Според увидот на вакциналниот статус на учениците од основното училиште “Братство Единство” каде има потврден случај со мали сипаници, 19 деца не се вакцинирани со МРП вакцина.
Градоначалникот Миевски апелираше до родителите да си ги вакцинираат децата, за да нема опасност од ширење на заразата која е опасна по живот и е лесно пренослива.
Во меѓувреме, Комисијата за заразни болести на дневна основа ја следи состојбата со морбили. Според епидемиолозите овој случај не претставува здравствена криза и засега нема потреба од дополнителни мерки, освен препораките кои веќе ги издаде ИЈЗ за проверка на вакциналните картони во општина Петровец каде живее детето.
Инаку, засега нема механизам со кој би се наложила задолжителна изолација на заразено дете со морбили и се е оставено на совеста на родителите.
Дополнителен ризик за евентуално ширење на заразата според докторите е нискиот опфат со МРП вакцината која е само 73 проценти во Скопје.
Според имунолозите, во главниот град е проблематично бидејќи има одредени општини како Аеродром и Центар каде се загрижувачки бројките и се вакцинирани можеби 50 проценти од децата.
Ања Лукарова
