Актуелната пратеничка на ВМРО-ДПМНЕ, Марија Митева и поранешната уредничка и новинарка, Венера Љатифи Азизи се назначени на нови портпаролки на владата.
Митева на професионален план поседува богато работно искуство во правната и политичката сфера, со повеќе од 10 години прогресивно работно искуство. Нејзината професионална историја вклучува позиции како советник за правни работи во владата, како и советник за нормативни работи во Град Скопје. Во изминативе години активно се занимава со политика, што резултираше со нејзин избор за пратеник во собранието. Љатифи-Азизи, е поранешна уредничка и новинарка во Радио Слободна Европа во Прага, уредничка во новинската агенција МИА, уредничка и водителка во Алсат -м телевизија, уредничка во весникот Коха, А1 телевизија, и други медиуми во земјата. Актуелно вработена во кабинетот на градоначалникот на Општина Чаир како одговорно лице за односи со јавноста и за поддршка на градоначалникот. Нивната работа ќе ја координира досегашниот портпарол на ВМРО-ДПМНЕ, Наум Стоилковски кој е именуван за советник за комуникации и односи со јавност.
