Гласањето во Чаир, една од клучните скопски општини каде трката за градоначалникото место е една од најнезивесните, минува мирно, во демократска атмосфера и без некои поголеми нарушувања. Сите гласачки места беа отворени точно во 07:00 часот изутринава, и гласањето, односно целиот изборен процес засега е без некој посериозни проблеми. Помал инцидент е забележан во основното училиште Имри Елези, каде двајца граѓани беа повикани на разговор затоа што останале на гласачкото место и по гласањето. Од МВР велат дека против нив нема покренато никаква постапка и дека гласањето продолжило нормално.
„Гласачкото место го отворивме во 07:00 часот. Се беше комплет со изборните материјали, се беше комплет. Околу 100 досега има излезено гласачи, нема забелешки никави досега, се се одвива во нормален редослед“, изјави Сузана Антанасовска од избирачко место 2921 ОУ „Петар Здравковски Пенко“.
Чаирчани без големи очекувања од кандидатите за градоначалници. Некои од нив дури и со иронија му упатија порака до идниот градоначалник.
Според податоците на Државната изборна комисија, досега највисока излезност од сите скопски општини е забележана во Чаир и Сарај, додека најниска во Шуто Оризари. До 15 часот во Чаир излезеноста е 35,3%.
