По години чекање, студентите конечно ќе добијат модерен и функционален студентски дом. Од јули започнува комплетната реконструкција на домот „Браќа Миладиновци“ во Штип, со што значително ќе се подобрат условите за живот и престој на студентите. Со инвестиција од околу 2,3 милиони евра, старата зграда ќе стане енергетски ефикасна, ќе добие нова фасада и кров, а ќе бидат поставени и фотоволтаични панели.
„Целосно опремување на студентските соби, со цел да се обезбеди поголем комфор на студентите. Ќе има комплетна реконструкција на кујната со обезбедување опрема по ХАСАП системи, целосна замена на водоводната и канализациската мрежа, како и на електричната инсталација, како и целосна замена на системот за греење“, изјави Гордана Барбашка, директорка на студентскиот дом „Браќа Миладиновци“ во Штип.
„Браќа Миладиновци“ е единствениот државен студентски дом во Штип, во кој престојуваат 130 студенти и 180 средношколци. Според планот, реконструкцијата на објектот треба да заврши во рок од 18 месеци. Во меѓувреме, објаснува Барбашка, се прават планови и анализи за нивно времено сместување, со цел никој да не остане без покрив над главата.
„Како можна алтернатива за згрижување на учениците и студентите во тој период се вршат преговори со Министерството, така што детали сѐ уште нема, меѓутоа се прават напори сите студенти и средношколци да бидат згрижени и никој да не остане на улица“, изјави Гордана Барбашка, директорка на студентскиот дом „Браќа Миладиновци“ во Штип.
Со проектот за енергетски ефикасна рехабилитација на државните студентски домови се опфатени вкупно девет студентски домови во Скопје, Прилеп, Битола, Штип и Охрид. Проектот се реализира со финансиска поддршка од Германската развојна банка.
