Земјава има доволно нафтени деривати и во моментов нема потреба од било какви ограничувања, вели премиерот Христијан Мицкоски. Додава дека ограничувања се уште не се потребни, иако, како што нагласува, има зголемена потрошувачка, пред се поради тоа што голем дел од граѓаните од соседните земји доашаат да точат гориво кај нас.
-Во моментов немаме никакви индиции дека би имало потреба од ограничување од аспект на волумен како што направија некои земји од ЕУ. Не само што тоа не го правиме, туку голем дел од граѓаните од нашите соседи доаѓаат кај нас и ги полнат резервоарите со гориво. Зголемена е потрошувачката. Ако во првиот месец беше 10 проценти сега веќе е 15 проценти, рече Мицкоски и додаде дека сега за сега нема потреба од вовдување на некои од препораките за штедење по примерот на ЕУ бидејќи има доволно количини на горива.
Од понеделник, како што рече, се очекува бензините да бидат со цена од 1,32 до 1,37 евра, а нафтата да биде меѓу 1,5 и 1,53 евра за литар. Во продуктоводот Солун-Скопје, како што кажа, има нафтени деривати за 60-тина дена плус за 62 дена во стоковите резерви.
-Во моментов не гледам опасност од количините што е прв приоритет. Втор приоритет е да ги одржиме цената и стабилноста на цената за да не ни се случи како во 2022 година да имаме двоцифрена инфлација. До сега рубусниот пристап дава резултати, а за потоа ќе видиме како ќе се развива кризата. Анализираме се и врз основа на тоа ќе ги носиме натамошните одлуки, нагласи Мицкоски во изјава по увидот во градежни работи на изградбата на училиште во Општина Илинден.
