Македонската влада не е наивна и нема на паѓа во замките на Бугарија чии политичари по секоја цена сакаат да го злоупотребат македонското прашање во предизборната кампања. Премиерот Христијан Мицкоски е дециден дека Македонија нема да прифаќа уцени и ултиматуми, а евентуални нови преговори со Бугарија ќе се водат врз основа на принципи и вредности. Тој повтори дека е подготвен да разговара со источниот сосед за изнаоѓање на решение кое ќе биде прифатливо за двете страни, а не како неговите претходници кои замижуваа на сите провокации и се согласуваа на исполнување на сите барања од Софија.
- “Бугарија, бугарската Влада, бугарскиот претседател и политичари сакаат сега да ја вовлечат темата Македонија таму во нивното предизборие. Јас сум го кажал тоа повеќе пати, ние нема да бидеме наивни и да влегуваме во такви замки. Имаме наш интерес и наша цел и сакаме да чекориме цврсто кон реализирање на тој наш интерес и нашата цел. Што се однесува до разговорите со нашиот источен сосед ние сме подготвени кога сакаат и врз основа на која платформа или план сакааат да седнеме да разговараме и да најдеме решение и нормално, да ги почитуваме меѓународните стандарди”, рече Мицкоски.
Оваа реакција доаѓа откако бугарското МНР порача дека процесот на евроинтеграции не дозволува посредување меѓу Европската Унија и земја-кандидат. Нешто што го понуди премиерот на Унгарија Виктор Орбан.
- “Она што беше понуда од моменталниот претседавач со ЕУ, тоа е претседателот на унгарската Влада Виктор Орбан, е во име на претседателствувањето со Европската Унија. Сега треба да видиме кој во Бугарија какви сигнали испраќа, некој испраќа едни, други испраќаат други сигнали. Кај нас сигналот е јасен сакаме решение кое ќе биде достоинтвено. Уцени и ултиматуми не прифаќаме”, рече премиерот Мицкоски.
Денот кога од Брисел стигна веста за одвојувањето на Тирана и Скопје во преговорите со ЕУ, премиерот на Унгарија Виктор Орбан оцени дека ваквиот потег е „историска грешка“, и понуди, Унгарија да биде посредник меѓу Македонија и Бугарија.
Истиот ден бугарските политичари го одбија ова барање, а во најновата реакција, бугарското МНР порача дека единствена гаранција за успех било исполнувањето на поставените критериуми и услови.
