Идејата ни е од ништото што го остави СДСМ да направиме нешто – ова е одговорот на премиерот Мицкоски на прашањето за што ќе се потрошат половина милијарда евра кредит од Унгарија. Вели дека опозицијата се избрзала со критиките дека Владата се задолжила помалку од најавеното. Напротив, со Унгарија била договорена отворена рамка за финансирање, па можело да се повлечат и повеќе од една милијарда евра, но во вистинското време. Ако сега се земеле сите пари, само ќе се потрошеле беспотребно на камати, а веќе кон крајот на јануари доспевала еврообврзница издадена од претходната Влада.
„Имаме обврзница што ја земаа под ултра лоши услови, но таа доспева на 25 јануари. Зошто сега да земеме 500 милиони па граѓаните да плаќаат камата, кога можеме во јануари. Отворена ни е рамката. Зошто сега да плаќаме 10 – 15 милиони евра, ќе направиме вакви сали уште 30, зошто да ги трошиме тие пари? Мора да имате концепт, со пари сите знаат, но идејата е од ништо нешто да направите“ – вели Мицкоски.
Премиерот веќе најави дека половина од парите, односно 250 милиони евра ќе завршат кај општините на наменски сметки за капитални проекти. Останатите ќе бидат за инвестиции на стопанството. Фирмите ќе добијат 250 милиони евра со камати пониски од пазарните, но ќе треба и да исполнат одредени услови: да инвестираат за половина повеќе од доделените пари, да имаат нови вработувања и да имаат голем раст на производството.
За позајмените пари, аналитичарите алармираа дека треба да завршат на вистинското место, а опозицијата критикуваше дека со финансирање на проекти за општините Владата се подготвува за локални избори и селективно ќе ги доделува парите. Мицкоски веќе најави дека пари ќе има за сите, а министерката за финансии дека со посебна формула ќе се обезбеди рамномерен регионален развој.
Планирано е ребалансот на буџетот да се најде на владина седница веќе утре. Министерката Димитриеска Кочоска најави дека има простор за пренамена на 200 до 300 милиони евра. Овие пари ќе се потрошат за зголемени пензии и за проекти за општините. Приходите, расходите и дефицитот во апсолутна бројка ќе останат исти, но дупката во државната каса како процент од БДП ќе биде поголема. Премиерот истакна дека претходната власт го оставила буџетот во катастрофална состојба, па веќе во следните три години требало да се вратат 2,87 милијарди евра долгови, сума еднаква на половина од државниот буџет.
