Падна договор – Владата успеа во преговорите со банкарскиот сектор да договори каматна стапка од само 1.95 отсто за кредитите за бизнисот од унгарскиот заем наместо почетната позиција од 3,25. Според премиерот Христијан Мицкоски, ова е стапката на кредитниот ризик која фирмите ќе и ја плаќаат на банките. Добар дел од комерцијалните банки дале потврда и очекувањата се дека ќе се вклучат сите. Се очекува, парите многу скоро да бидат достапни за фирмите.
– Договорена е каматна стапка од 1,95 проценти, до три години грејс период и до 15 години рок на отплата во зависност од потребите на компаниите. Ценам дека е ова историски договор со историска најниска каматна стапка, рече Мицкоски во одговор на новинарско прашање по денешното пуштање во употреба на новата спортска сала во ООУ „Наум Охридски“ во скопското село Булачани.
Условите се фирмите да имаат 20 отсто сопствено учество што ќе придонесе за поттикнување на инвестициски циклус и раст на економијата. Токму на овој начин, Владата очекува да се постигне раст од над 3 отсто кој е проектиран во буџетот за догодина. Се очекува инвестицискиот бран на стопанството да биде 300 милиони евра.
– Тоа значи дека ќе имаме инвестициски бран од 300 милиони евра. Сите компании ќе имаат можност да ги вложат овие средства во основни средства за работа, во обновливи извори на енергија, како и во објекти кои ќе ги користат како свои административни згради, односно за сопствена потреба, рече Мицкоски.
По состаноците со банките беше соопштено дека тие се согласуваат на рочноста односно да нудат кредити со рок на отплата до 15 години со грејс период до три години. Секоја компанија ќе може да аплицира во банка по избор и потоа Развојната банка ќе трансферира пари до таа одредена банка.
Од бизнис коморите веќе го поздравија потегот на Владата за вбризгување пари во економијата. Тие со нетрпение ги очекуваат парите и порачаа банките да се однесуваат разумно.
