Премиерот Христијан Мицкоски денеска, при отворањето на објект за обука на нови припадници на МВР, се осврна на корупцијата и криминалот во Македонија.
„Владеењето на правото и безбедноста на граѓаните се темелни вредности, и ние како Влада имаме обврска да ги почитуваме. Сè што се случувало и што ќе се случува е дел од бескомпромисната борба против криминалот и корупцијата. Во минатото, многу од нашите сограѓани се чувствуваа како граѓани од втор ред, додека мала група од СДСМ-ДУИ беа граѓани од прв ред. Сега нема привилегирани, борбата против криминалот и корупцијата е безмилосна, и мора да покажеме дека е неисплатливо да се занимавате со криминал и корупција“, истакна Мицкоски.
Премиерот потоа го спомена и еден обвинител, за кого рече дека „се одлучил да биде верен слуга на партија која била долги години на власт, наместо да спроведува правда“.
„Еден обвинител, наместо да спроведува правда, се одлучи да биде верен слуга на една партија која беше долги години на власт. Вие новинарите добро знаете за кого зборувам, за оној кој имаше уво за ушка на една слика“, додаде Мицкоски.
