Жестоки и цврсти аргументи, откочување на македонските евроинтеграции со заштита на државните и национални интереси – само на овој начин, со проактивна дипломатија и лобирање во европските институции може да се постигне успех и Македонија да се приближи до европското семејство, со една цел, еден ден да стане дел од блокот. Премиерот Христијан Мицкоски не верува во инстант решенија и вели дека ќе претстои силна борба на овој пат. Сепак, според него за доброто на граѓаните вредела секоја жртва. Не крие дека ќе биде тешко да се исправат грешките на неговите претходници кои воделе егзибиционистичка надворешна политика.
Спорот е наметнат и политиката на претходната власт беше политика во која подалеку од носот не гледаше никој, рече Мицкоски.
На средбите во Брисел се воделе конкретни дискусии околу изнаоѓање прифатливо решение. Владата настојува на уставни измени со одложено дејство, а овој став ќе го брани и на Самитот ЕУ – Западен Балкан кој ќе се одржи во втората половина од декември, но и на средбите со Европската народна партија.
Разговаравме за сите теми од суштинско значење, поминуваме низ аргументите, даваме нови аргументи. Ова се нов состав, голем дел од информациите кои ги примаат се нови. Врз основа на тие дискусии очекувам дополнително да се развијат определени можни решенија. На 17-ти има Самит, ЕУ и Западен Балкан, ќе бидам пак таму, рече Мицкоски.
Она што го слушнале новите европски челници вчера е и фактот дека и покрај сите жртви што Македонија ги направи низ годините,остана во чекалната.
Македонскиот државен врв го реафирмираше ставот дека ултиматуми веќе нема да се прифаќаат, и дека ќе се разговара онолку колку што е потребно за што поскоро да се отвори првиот кластер.
