Македонија стои цврсто на патот на реформите на европската интеграција и на борбата против корупцијата и од тој пат назад нема, порача премиерот Христијан Мицкоски кој денеска имаше средба со извршниот директор на Партнерството за отворена власт, Аидан Ејакуза. Мицкоски нагласува дека процесот на приближување кон Европската Унија не е само административна постапка туку суштински трансформациски пат. Во фокус се вели граѓаните и нивната доверба во институциите кои преку транспарентност и отчетност се фокусирани на клучните реформи:
“Кога институциите се отворени и отчетни тогаш нема место за злоупотреба, ниту за загрозување на слободите и демократијата. Овој состанок е доказ дека ние не бегаме од проблемите туку дека истите ги препознаваме и решаваме. Ние не се плашиме од предизвици туку истите ги совладуваме.”- изјави Мицкоски.
Партнерството за отворена власт со Македонија започна во 2011 година. Според Ејакуза главната цел е транспарентноста и отчетноста на владата, да се елиминира корупцијата и да се врати довербата на граѓаните во јавните институции. Тоа бил клучен момент за покажување на напредок за да се пристапи кон ЕУ.
„Отоврената влада нуди подобрување со тоа што ги повикува граѓаните да ги обликуваат јавните приоритети да учествуваат во креирање на законите и со тоа да се чувствуваат како владата да се нивни партнери во решавањето на приоритетите и нивните главни проблеми“.- изјави Аидан Ејакуза.
Министерот за јавна администрација, Горан Минчев истакна дека Македонија останува целосно посветена на принципите на отворено владеење и дека ПОВ е клучна рамка за подобрување на квалитетот на јавните услуги и довербата на граѓаните во институциите.
” Нашата крајна цел е да изградиме јавна администрација која е професионална, отворена, достапна и во служба на граѓаните. Партнерството за отворена власт ни овозможува да ги зајакнеме механизмите за транспарентност и отчетност, но и да создадеме услови за поефикасни, квалитетни и правични јавни услуги. За нас, ова не е само меѓународна обврска, туку реална можност за подобрување на секојдневието на граѓаните,” изјави Минчев.
Стратешките активности на Министерството за јавна администрација во насока на унапредување на транспарентноста, отчетноста, дигитализацијата и граѓанското учество во институциите се дел од Националниот акциски план 2024-2026. Организацијата Партнерство за отворена власт е формирана во 2011 година и досега има соработка со 74 национални Влади.
