Поголемо поевтинуваање на дизелот од вторник. Премиерот Мицкоски очекува Регулаторната комисија за енергетика да одлучи во понеделник цената на дизелот да се намали до 6 и пол денари по литар, а бензините да останат со исти или благо покачени цени за половина денар. Истовремено Владата ќе ги продолжи мерките за заштита на животниот стандард на граѓаните, а преговара и со ОКТА да обезбеди попуст за првата половина од јуни. Ќе се изгласа поволностите да важат и во следните две недели. Седницата ќе се одржи утре, затоа што мерките истекуваат во понеделник, па одлуките треба навремено да се донесат. Се работи за интервенции кај акцизите, кои се намалуваат за 2 денари и за бензините и за дизелот. Тоа значи дека за бензините ќе продолжат да се пресметуваат акцизи од 20 денари по литар, а за дизелот од 13,5 денари по литар. ДДВ-то се враќа од 10 на 18%.
„Очекувам цената на бензините да остане иста или да има мало зголемување од половина денар, а дизелот да поевтини околу 6 и пол денара, 6 до 6,5 денара. Отприлика ова се бројките кои нашите калкулации ги кажуваат, а ќе видиме како како ќе направи пресметка регулаторно“ – истакна Мицкоски.
При последната промена на цените од страна на Регулаторната комисија за енергетика, цените на горивата минимално се зголемија, односно бензините поскапеа за половина ден по литар, а кај дизелот немаше промена. Мицкоски вели дека очекува период на стабилизација на цените.
„И кога сето ова ќе се ќе се заокружи, ние и денеска, односно и она што го очекуваме во понеделник, ќе останеме држава со убедливо најниски цени на на горивата, односно на на дизел горивото и на бензините. Ако се оствари оваа наша калкулација како точна, бензините би останале или иста цена или половина денар би поскапеле, а дизелот би поевтинил за 6 до 6,5 денари по литар. Така што, остануваме и понатаму посветени на подобрување на стандардот на граѓаните“ – потенцира премиерот Мицкоски.
Македонија и натаму има најниски цени на горивата на Балканот. Додека кај нас бензините се продаваат за под 90 денари по литар , а дизелот за 92 денари, во Бугарија цените на горивата изнесуваат 92,6 денари по литар, во Босна и Херцеговина цената е 93 денари по литар, а во Црна Гора достигнуваат 99 денари. Бензините во Хрватска неделава чинат 101 денар, а во Србија 102 денари по литар. Убедливо највисоки цениу во регионот имаат Албанија и Грција кадешто горивата се продаваат за 122 денари, односно 130 денари по литар.
На ниво на цел европски континент, најниски цени на бензините има во Русија и Белорусија од околу 50 денар по литар, а највисоки во Данска од 149 денари по литар.
Инаку цената на нафтата на светските берзи доживеа благ пад последнава седмица. Ако се тргуваше за 96,6 долари за барел во понеделникот, постепено се намалуваше до 91 долар за барел на крајот на неделава за испораки во август.
