Премиерот Христијан Мицкоски испрати покани за лидерска средба до сите парламентарни партии. Средбата е закажана за Василица на 14 јануари и вообичаено ќе се одржи во Клубот на пратеници. На средбата, како што е најавено досега се очекува дебата за техничката влада, но и за избор на Народен правобранител, како и за некои од законите од реформската агенда што се носат со двотретинско мнозинство, како оној за Јавно Обвинителство.
И покрајј ставот на најголемата опозициска партија СДСМ да не учествува на таква средба, тоа не го спречи Мицкоски да испрати покани.
Претседателот на СДСМ, Венко Филипче пред некој ден, категорично одби учество на лидерската средба. Тој ја отфрли и можноста за укинување на техничката влада, оценувајќи ја како единствена пречка за воспоставување на авторитарен режим. Според него, власта на Христијан Мицкоски не сака техничка влада не поради ефикасност, туку поради страв од контрола.
Неизвесно е присуството и на ДУИ и Левица. Од ДУИ соопштија дека откако официјално ќе ја добијат поканата ќе го кажат својот став за присуството на средбата. Опозициската Левица веќе соопшти дека се залага за укинување на техничката влада, но нејзиното укинување би било прифатливо само доколку е проследено со вистински, а не декларативни демократски реформи и воведување на една изборна единица.
Од Владејачката коалиција ВРЕДИ, принципиелно стојат зад ваквата иницијатива на Мицкоски. Тие веќе информираа дека ВРЕДИ е секогаш отворена за секоја средба насочена кон функционирање на институциите и наоѓање решенија во интерес на граѓаните.
Потребата од лидерска средба се наметна на политичката сцена откако премиерот побара политичко единство од сите партии во Парламентот, во однос на спроведувањето на реформите и изгласувањето на законите, се со цел забрзување на евроинтеграцискиот пат на Македонија.
