Протестите се демократска алатка, но, има обид за злоупотреба на гневот кај граѓаните. Премиерот Мицкоски вели дека има разбирање за оние кои сакаат да го изразат револтот, зошто има уште многу работи да се решат, но, потенцира дека не ги разбира политичките глодари и лешинари кои преку жртвите од трагедијата во Кочани и тагата на семејствата, сакаат да ќарат политички поени.
„За многу работи оваа Влада беше браник да не дозволиме да продолжи понижувањето, разграбувањето, националното уништување на Македонија. И токму тоа е за тие политички глодари проблем кој сакаат преку овие протести да добијат некој политички поен, па гледаат шанса“, изјави Христијан Мицкоски, премиер на Македонија.
Свесен за проблемите со кои се соочува Македонија и за тоа дека преку ноќ не може ништо да се направи, премиерот повика на смиреност и разум во овие тешки моменти. Вети дека со Владата ќе се бори до последен атом енергија за да ги исправи работите.
„И јас сум нервозен, верувам дека сите сме незадоволни од сето тоа што се случува и тука не треба да имаме дилема. Работите ги решаваме и ќе продолжиме да ги решаваме. Многу работи изминативе 9 месеци, откако е избрана оваа Влада, се решија. Направивме многу работи, поразивме многу мафијашки здруженија. Отсега па натаму би посакал да останеме фокусирани во решавање на проблемите“, изјави премиерот Христијан Мицкоски.
Во повеќе градови низ државава и во Скопје денес се закажани протести во чест на загинатите 59 млади луѓе во ужасниот пожар во Кочани. Сепак, одредени политички центри се обидуваат да ја злоупотребат трагедијата и да се инфилтрираат во граѓанските движења за што викендов на социјалните мрежи испливаа и видео снимки.
