Огромен метеж пред Управата за јавни приходи. Редици од луѓе со маски, но без држење соодветна дистанца од другите можеа да се забележат пред административната зграда. Револтирани граѓани и претставници на фирми чекаат со часови, а некои и по неколку дена не можат да завршат работа. Реагираат дека за одредени процедури кои можат да се реализираат електронски, се принудени да доаѓаат на шалтер. Се дополнува документација за помош за исплата на плати, за детски додаток, за ситни административни работи. Револтирани се бидејќи некои фирми со врски завршуваат навреме, а други се принудени да чекаат. Алармираат дека здравствените протоколи не се почитуваат. Документите се оставаат и подигаат од кутија поставена пред влезот во која илјадници раце ги фаќаат хартиите.
„Имам некоја блокада во банка, не знам зошто е, па да прашам. Што да ви кажам, не одам често по служби на институции и не знам“
„Па, еве, половина час чекаме. За изјава за детски додаток чекам. Сега внатре има пауза“
„Дојдов, ми кажаа дека ќе биде за половина час готово. За секој случај, дојдов за 45 минути. Ми кажаа дека не е готово. Ги собраа кутиите, влегоа внатре. Не пишува ниту кога им е работно време, пауза, заминаа, собраа. Во меѓувреме дојде човек, го поднесе пликото додека чекав и за 3 минути му го вратија, му беше готово“
Институциите поради корона вирусот работат со помалку работници. Министерот за администрација Манчевски тврди дека протоколите за заштита на здравјето се почитуваат во јавниот сектор. Неговата дополнителна заменичка Невенка Стаменковска, пак, предупредува дека илјадници животи на вработените во јавниот сектор се доведени во ризик и дека треба да се санкционираат сите административци кои не носат маски, не одржуваат хигиена и ги загрозуваат нивните колеги и клиенти.
Тања Попова
