На панел-дискусијата организирана од Универзитетот „Мајка Тереза“, првиот вицепремиер на Владата на Македонија, Изет Меџити, разговараше за предизвиците и перспективите на младите и квалитетното образование во државата.
Во својот говор, г. Меџити истакна дека младите и образованието се главните столбови за развиено општество, подвлекувајќи ја определбата на Владата да инвестира во иднината на младите преку конкретни проекти и одржлива поддршка.
„Ако сакаме сигурна и просперитетна иднина, мора да инвестираме денес во нашите млади и студенти – не само со зборови, туку и со конкретни проекти“, рече г. Меџити.
Тој сподели некои од клучните одлуки на владата за зајакнување на образованието и поддршка на младите:
Инвестицијата во Универзитетскиот кампус „Мајка Тереза“ – Со фонд од 35 милиони евра, Владата обезбеди изградба на модерен кампус, кој има за цел да ја подобри инфраструктурата и да создаде инспиративна средина за студентите и академскиот кадар.
Поддршка за студенти – Од 2025 година ќе се нудат ваучери од 250 евра за набавка на технолошка опрема како компјутери, телефони или таблети, со што ќе се олесни пристапот до потребните алатки за квалитетно образование.
Фонд од 10 милиони евра за млади – Овој фонд е наменет за развој на нови бизниси, со финансирање до 30.000 евра за секој успешен проект, поддржувајќи ги идеите и иницијативите на младите до 29 години.
Г-дин Меџити ги покани студентите да бидат активни и конструктивно да соработуваат со институциите за справување со нивните предизвици.
„Студентите не се само учесници во аудиториумите, туку се и важни партнери во градењето на иднината на државата. Заедно можеме да создадеме подобро и поправедно општество за сите“, заклучи Меџити
