Обвинувања за „пучисти и шемаџии“, па одговор за глумење жртви и екзекутор. Се разгоруваат искрите помеѓу раководството на Социјал-демократите и Платформата 12:05.
Филипче ги обвинува дека членовите на Платформата му правеле пуч по вмровски шеми со цел ослабнување на СДСМ и дефокусирање на јавноста од вистинските проблеми.
- „Година дена наназад работат против партијата, роварат, зборуваат со луѓе, шират невистини, клевети, лаги. Се поставува прашањето зошто сега, во овој момент така силно излегоа во јавноста?“, рече Филипче.
Венко Филипче не е претседател на членството туку на фиктивни картички за гласање – одговараат иницијаторите за кадровски промени во СДСМ по обвинувањата од партискиот претседател.
Раководството на Бихакќа е главен кочничар на обединувањето на опозицијата чија единствена цел му е да се докопаат до пратенички мандати, стои во реакцијата од платформата „Разговори за иднината во 12:05“. Тие му возвраќаат дека масата на која седеле вчера тежела минумум 150 илјади гласови.
- „Со сите притисоци врз членовите, тој на прес конференцијата собра половина раководство и стотина луѓе во публика. Тоа е помалку од еден процент од гласовите кои наводно ги освои на внатрепартиските избори. Венко Филипче нема образ за обвинувањата кои ги пласира“ велат од Платформа „Разговори за иднината во 12:05“.
Реагираа и од владејачката партија. За циркусот во опозицијата, Филипче вината да не ја бара во ВМРО-ДПМНЕ.
- „Од една страна Венко Филипче и талогот на СДС, од друга страна поранешни функционери на СДС, но и актуелни се поставуваат контра Филипче . И во сиот овој циркус, Филипче наместо да си ја гледа домашната работа, тој ја обвинува ВМРО-ДПМНЕ. Сè додека за Филипче само другите се виновни, СДС тешко дека може да се извлече од дното “– рече Бране Петрушевски.
Платформата за промени во СДСМ деновиве според најавите лично ќе му ја достави стратегијата на Филипче за консолидација на опозициските редови, а првиот услов за тоа е негова оставка.
